“Sizin səsiniz heç kimə lazım deyil, məni icra başçısı təyin edib artıq” – Zəyəm bələdiyyəsinin sədri kənd camaatını təhdid edir

17:41 | 12 Dekabr, 2019

112 saylı Qax seçki dairəsinin ərazisində yerləşən Zəyəm bələdiyyəsinin sədri, hazırda bələdiyyə üzvlüyünə namizəd Səfərov Kamil Səfər oğlu kənd camaatını təhdid edir. Zəyəm kənd sakinlərinin Qax.org.az saytına verdiyi məlumata görə, hər gün müxtəlif yerlərdə kənd camaatı ilə hədə-qorxu şəklində danışan Kamil Səfərov 23 Dekabr seçkilərində heç kimin səsverməyə getməsinə gərək olmadığını, onsuz da bələdiyyə üzvlərinin əvvəldən bəlli olduğunu deyib. Zəyəmliləri təhdid edən Kamil Səfərov Qax rayonunun icra başçısı Musa Şəkiliyevin onu “bələdiyyə sədri təyin etdiyini” (?!) və ona görə də, heç kimin səsinə ehtiyacı olmadığını deyib.

Qeyd edək ki, Kamil Səfərov Zəyəm kəndində yerli əhaliyə qarşı kobud davranışı, zəyəmlilərə məxsus torpaqların qeyri-qanuni yollarla və saxta sənədlərlə başqa adamlara satılması və digər qeyri-qanuni əməlləri ilə tanınır.

Azərbaycan ictimaiyyəti isə Kamil Səfərovu 2015-ci ildə keçirilən Milli Məclisə seçkilər zamanı kəndə təşviqata gəlmiş deputatlığa namizədlə kobud davranışından sonra tanımışdı.

Qarşı tərəfin mövqeyini də işıqlandırmağa hazırıq.

112 saylı Qax seçki dairəsində bu il dekabrın 23-nə təyin edilmiş növbəti bələdiyyə seçkilərinə ciddi hazırlıq işləri görülür. Builki seçkilərdə Qax rayonu üzrə 18 bələdiyyəyə 166 üzv seçiləcək. Səsvermə dairənin rayon ərazisində fəaliyyət göstərən 58 seçki məntəqəsində keçiriləcək.